शान्ति र स्थिरताको निम्ति लडिरहेका छौँ : मन्त्री रायमाझी

काठमाडौं : ऊर्जा, जलस्रोत तथा सिँचाईमन्त्री टोपबहादुर रायमाझीले शान्ति र स्थिरताको निम्ति लडिरहेको बताएका छन् । आइतबार अखिल नेपाल किसान महासंघ राष्ट्रिय समितिको बिस्तारित बैठकमा बोल्दै ऊर्जा मन्त्री रायमाझीले मुलुकमा शान्ति र स्थिरता स्थापनार्थ सहि नेतृत्वको आवश्यकताको लागि लडिरहेको बताएका हुन् । आर्थिक समृद्धिमा टेवा पुर्याउन, राष्ट्रियता र राष्ट्रिय अखण्डताको पक्षमा निर्भीक रुपमा उभिन सक्ने नेतृत्व देशलाई चाहिएको र त्यसतर्फ राजनीतिक बहस केन्द्रीत भइरहेको उनको तर्क छ।
उनले सम्वोधन गर्ने क्रममा हिजो हामीहरू राजनीतिक व्यवस्था फेर्नका लागि लडेका थियौ भने आज शान्ति र स्थिरताको लागि सही राजनीतिक नेतृत्वको पनि आवश्यकता छ भनेर हामी नलड्नुपर्ने लडाइँ लडिरहन परेको बताएका हुन। हिजोको लडाइँको क्षेत्रबाट आएका अवशेषहरू र धङधङीहरु अहिले पनि देखा पर्ने गरेको भन्दै अझै केही समय यस्तो रहने उल्लेख गरेका छन् ।
मन्त्री रायमाझीले नेपालको कृषिलाई सामुहिक रुपमा अगाडी बढाउनुपर्ने बताए । कृषिलाई ब्यक्तिवादी र निर्वाहमुखि चिन्तनबाट माथि उठाउँदै वैज्ञानिक आधुनिकरण र व्यवसायीकरणमा लैजानुपर्ने तर्क राखेका छन ।