काठमाडौं ।
देशभर पश्चिमी वायुको सामान्य प्रभाव कायमै रहेकाले आज सुदूरपश्चिम र लुम्बिनी प्रदेशका तराई भूभागमा अपरान्हतिर हावाहुरी चल्ने जल तथा मौसम विज्ञान विभागले जनाएको छ । देशको पहाडी भूभागमा आंशिक बदली कायमै रहने र बाँकी भूभागमा मौसम सफा रहनेछ ।
विभागका अनुसार आज दिउँसो प्रदेश १, गण्डकी, कर्णाली र सुदूरपश्चिम प्रदेशको पहाडी भूभागमा आंशिक बदली रहने छ ।
उच्च पहाडी भूभागका केही ठाउँमा हल्का हिमपात हुनेछ । त्यस्तै, आज राति प्रदेश १ को पहाडी भूभागमा आंशिक बदली रहने र एक दुई ठाउँमा हल्का हिमपातको सम्भावना छ ।
सोहीअनुसार भोलि फागुन १ गते सोमबार दिउँसो पहाडी भूभागमा आंशिक बदली रहने छ ।
राति पनि पहाडी भूभागमा सामान्य बदली रही बाँकी भुभागमा मौसम सफा रहने विभागले जनाएको छ । यसैबीच, फागुन २ गते मंगलबार पनि प्रदेश १ को पहाडी भूभागमा आंशिक बदली रहने छ । राति उच्च पहाडी भूभागका केही ठाउँमा हल्का हिमपात हुनेछ ।
देशका पहाडी भूभागमा सामान्य बदलीसँग तराईमा विहानीको समयमा हुस्सु र कुहिरो कायमै रहने हुनाले आवश्यक सतर्कता अपनाउन पनि विभागले आग्रह गरेको छ ।