१३ फाल्गुन २०८०, आइतवार
१३ फाल्गुन २०८०, आइतवार

पश्चिमको दु:ख , चौरमा बितेका रातहरु

बझाङ, बैतडीलगायतका पश्चिम नेपालका जिल्लामा भूकम्पबाट प्रभावित पीडितहरुको रात खुला चौरमा बितेको छ । पटक–पटक परकम्प गइरहेकाले स्थानीयबासिन्दा रातिदेखि घरबाहिरै खुला चौरमा बसेका हुन् । केही घरमा क्षति भएको र फेरि भूकम्प आउन सक्ने डरका कारण उनीहरु घरबाहिर बसेका छन् । यसले स्थानियमा त्रास पैदा गरिरहेको छ ।

बझाङका प्रमुख जिल्ला अधिकारी नारायण पाण्डेयका अनुसार भूकम्प पीडितलाई विद्यालय तथा सार्वजनिक ठाउँ र खुला चौरमा राखिएको छ । उनीहरुलाई ४० वटा पाल वितरण गरी टेन्टमा राखिएको हो । उनीहरुको खाने र अस्थायी रुपमा बस्नका लागि स्थानीय पालिकाको समन्वयमा व्यवस्थापन भइरहेको छ ।

बझाङमा हिजो दिउँसो ३ बजेर ६ मिनेटमा ६ दशमलव ३ रेक्टर स्केलको भूकम्प गएको थियो । त्यसअघि २ बजेर ४० मिनेटमा ५ दशमलव ३ रेक्टर स्केलको भूकम्प गएको थियो । यी भूकम्पपछि लगातार परकम्प गइरहेका छन् । भूकम्पमा परि बझाङमा १३ जना र बैतडीमा दुई जना घाइते भएका छन् ।

बझाङमा घाइते भएका १३ जनामध्ये २ जनाको उपचार भइरहेको अरु प्राथमिक उपचारपछि घर फर्किएका प्रमुख जिल्ला अधिकारी नारायण पाण्डेयले जानकारी दिनुभयो ।

त्यस्तै, बझाङको जयपृथ्वी नगरपालिका वडा नम्बर–११ की ४५ वर्षकी गुनदेवी धामी भूकम्पपछिको पहिरोमा बेपत्ता हुनुभएको छ । उहाँको खोजी भइरहेको बझाङका प्रहरी प्रवक्ता दीपेश चौधरीले जानकारी दिनुभयो ।

बझाङको चैनपुर आसपास केन्द्र बनाएर गएको भूकम्पले बझाङसहित बाजुरा, बैतडी, डोटी, डडेलधुरा, दार्चुलालगायत जिल्लामा भौतिक संरचनामा क्षति पुगेको छ । घर, विद्यालय तथा अन्य भौतिक क्षतिको पूर्ण विवरण सङ्कलनको काम भइरहेको छ ।

यो खबर पढेर तपाईलाई कस्तो महसुस भयो ?
  • खुसी (0%)
  • दुःखी (0%)
  • अचम्मित (0%)
  • हाँस्यास्पद (0%)
  • आक्रोशित (0%)
तपाईको प्रतिक्रिया

सम्बन्धित न्यूज

ट्रेन्डिङ्ग

ताजा समाचार