काठमाण्डौ ।
साफ महिला च्याम्पियनशिप अन्तर्गत दोस्रो सेमिफाइनलमा भारतलाई हराउँदै नेपाल फाइनल प्रवेश गरेको छ ।
काठमाण्डौको दशरथ रङ्गशालामा भएको खेलमा नेपालले भारतलाई एक–शून्य गोल अन्तरले हरायो । नेपालका लागि रश्मीकुमारी घिसिङले पहिलो हाफको इन्ज्युरी समयमा गोल गरिन् । घिसिङले प्रिती राईको क्रसलाई पेनाल्टी क्षेत्रबाट गोलमा परिणत गरिन् ।
अब नेपालले फाइनलमा बङ्ग्लादेशसँग खेल्नेछ । आजै भएको पहिलो सेमिफाइनलमा भुटानलाई आठ–शून्य गोलले हराउँदै बङ्ग्लादेश फाइनलमा पुगेको हो । फाइनल खेल सोमवार बेलुकी ५ बजे सुरु हुनेछ ।